Көпбалалы әке және физика пәнінің мұғалімі Абай Жанақпаев жарты жыл бұрын Астраханнан отбасымен бірге Атырауға көшіп келді, деп хабарлайды AtyrauTODAY тілшісі.
Мемлекеттік қолдау олардың тарихи отанында орнығуына мүмкіндік берді.
Мемлекеттік қолдау — көшуден баспанаға дейін
Абай бес баласымен бірге «қандас» мәртебесін алып, тұрғын үй мобильділігі сертификаты арқылы пәтердің құнының үштен бірін өтеді. Бұдан бөлек, мемлекет отбасының көшуі мен алғашқы бейімделуіне көмектескен.
«Қазір “мен — мұғаліммін” деп мақтанышпен айтамын, — дейді Абай. — Астраханда бұл мамандықтың беделі өте төмен еді: мұғалімді жиі тазалықшы немесе күзетші секілді қабылдайтын. Ал мұнда педагогтің мәртебесі шынымен жоғары».
Білім саласындағы реформалар мамандарды тартады
Абайдың көшуіне түрткі болған негізгі себептердің бірі — білім беру жүйесіндегі өзгерістер.
«Кеңестік мектептің ең жақсы жақтары сақталған: тәжірибелі мұғалімдер бар, жалақы жеткілікті. Сонымен бірге батыстық үлгідегі элементтер енгізілді: директорлардың ротациясы, 10 балдық бағалау жүйесі, кәсіби бағдар беру, буллингтің болмауы», — дейді ол.
Оның сөзінше, Атыраудағы мектептердің даму қарқыны Ресеймен салыстырғанда анық байқалады:
«Директорлар ауысып тұрады, мектептер жаңарып, жаңа энергия мен идеялар келуде».
Қоныс аударушылар өңірдің дамуына әсер етеді
Мамандардың айтуынша, қоныс аударушылар өңірдің әлеуметтік-экономикалық дамуына оң ықпал етеді: еңбек нарығын толықтырады, кәсіп ашып, жаңа жұмыс орындарын құрады.
«Бүгінге дейін 62 отбасы жалпы сомасы 27 миллион теңгеден асатын әлеуметтік төлем алды. Тағы 23 отбасы ай сайын тұрғын үйді жалға алу бойынша төлемдер алып отыр, ал бес отбасы пәтер сатып алуға арналған экономикалық мобильдік сертификатқа ие болды», — дейді облыстық жұмыспен қамту және әлеуметтік бағдарламалар басқармасының бас маманы Асылзада Сүндетова.
Атырау — жүздеген қоныс аударушының жаңа үйі
Жыл басынан бері Атырауға 173 отбасы — шамамен 300 адам қоныс аударды. Өңір қоныс аударушыларды қабылдау бойынша Алматыдан кейінгі жетекші орындардың бірін иеленіп отыр.
«Атырауды адамдардың таңдауы бекер емес: мұнда жаңа өндірістер қарқынды дамып жатыр, жұмыс орындары ашылуда. Мемлекеттік қолдау жаңа өмірге тез бейімделуге мүмкіндік береді», — деп түйіндеді Абай Жанақпаев.
Лия НҰРТАЙ
