Құқық қорғау саласында еңбек етіп жүрген жас маманның басты мақсаты – азаматтардың конституциялық құқықтары мен бостандықтарын қорғау, қоғамдық тәртіпті сақтау және өз әкімшілік аумағындағы тұрақтылықты қамтамасыз ету. Темірлан Ажханов қызмет атқаратын аумақта 17 мыңнан астам тұрғын бар. Бұл – үлкен жауапкершілік жүктейтін көрсеткіш. Учаскелік полиция инспекторының жұмысы көбіне көзге көріне бермейді. Қоғам қауіпсіздігі тек көшедегі патрульмен ғана емес, құжат айналымының дәлдігімен, өтініштер мен арыз-шағымдардың уақтылы қаралуымен, алдын алу шараларының жүйелі жүргізілуімен де өлшенеді. Полиция пунктіндегі күнделікті қызмет – есеп жүргізу, азаматтарды қабылдау, құқық бұзушылықтардың алдын алу бойынша талдау жасау, профилактикалық жұмыстарды жоспарлау сынды маңызды міндеттерден тұрады.
Темірланның жұмыс күні сағат 8:30-да басталады. Күн тәртібін жүйелі ұйымдастыру – оның кәсіби әдетіне айналған. Таңғы уақытты жүгіруге арнап, салауатты өмір салтын ұстануды да назардан тыс қалдырмайды. Спорт – оның хоббиі ғана емес, қызметке деген сергектігін арттыратын өмірлік қағидасы.
Жас маман бола тұра, ол жауапкершілік пен сабырлылықты басты орынға қояды. Қоғаммен тікелей байланыс орнату, әрбір өтінішке мұқият қарау, заң талаптарын бұлжытпай орындау – оның күнделікті жұмысының ажырамас бөлігі. Полиция пунктіндегі тиянақты, мұқият еңбек – аумақтағы тұрақтылықтың берік іргетасы.
Қоғам тыныштығы – көзге көрінбейтін, бірақ үздіксіз атқарылатын еңбектің нәтижесі. Осындай жауапкершілікті сезініп, адал қызмет етіп жүрген полиция аға лейтенанты Темірлан Ажханов – өз ісіне берілген жас мамандардың жарқын үлгісі.
