Атырауда әйелді қатыгездікпен өлтіру ісі бойынша сот үкімі шықты. Қаланың 41 жастағы тұрғыны ҚР Қылмыстық кодексінің «Адам өлтіру» бабы бойынша кінәлі деп танылып, 10 жылға бас бостандығынан айырылды, деп хабарлайды AtyrauTODAY тілшісі.
Іс Атырау облысының мамандандырылған ауданаралық қылмыстық істер жөніндегі сотында, судья Тыныштық Нұрымованың төрағалығымен қаралды.
Қайғылы оқиға 19 тамызда болған. Ер адам 39 жастағы әйелі Ләззат Тасқынбаеваны өздерінің 6 және 12 жастағы қыздарының көз алдында соққыға жығып өлтірген. Ерлі-зайыптылар 14 жыл бойы некеде тұрған. Туыстарының айтуынша, ер адам мас күйінде болған кезде әйеліне жүйелі түрде зорлық-зомбылық көрсеткен.
Оқиға күні ол әйелге бірнеше рет соққы жасаған, ал өлімге бастың артқы жағына тиген қатты соққы себеп болған. Оқиғадан кейін ер адам жедел жәрдем шақырмай, әпкелерімен байланысқа шыққан.
— Қыздар жылап: «Анашым, оян! Сен жай ғана жатырсың! Тұр!» деп айтып жатты, — деді марқұмның немере әпкесі.
Сот отырысында айыпталушы қыздарынан кешірім сұрайтынын мәлімдеді.
