Атырау әкімдігі әуежай маңындағы кәсіпкердің жер учаскесін мемлекет қажеттілігіне алмақ, деп хабарлайды AtyrauTODAY тілшісі.
Атырауда кәсіпкер Иван Фролов пен қалалық әкімдік арасында дау туындады. Билік жаңа әуежай терминалын салу үшін оның жер учаскесін мемлекет қажетіне алуды жоспарлап отыр. Жаңа терминалдың аумағы 16 мың шаршы метр болмақ. Фроловтың айтуынша, оған реконструкция жобасы да, ресми құжаттар да көрсетілмеген.
«Натали» кафесі: 30 жылдан бері жұмыс істеп келе жатқан бизнес
Кафе әуежай аумағында 1993 жылдан бері қызмет етіп келеді. Алты ай бұрын кәсіпкерге жер учаскесінің мемлекет қажетіне алынатыны туралы хабарлама берілген.
Иван Фролов:
«Сатып алушылар келіп, жерді сатып алуды ұсынды, бірақ мен бас тарттым. Осыдан кейін “әкімдікпен мәселелер туындауы мүмкін” дегенді естідім. Мені тыныш қалдырсын, бұл шешімді заңсыз деп санаймын».
Жоба — жер иесінің қатысуынсыз
Әуежай катарлық компанияның сенімгерлік басқаруына берілгеннен кейін кеңейту жобасы әзірленген. Әуежай өкілдерінің айтуынша, жобаға кафенің аумағы да кіреді. Жаңа терминал жылдық жолаушылар ағынын 3 миллион адамға дейін арттыруы тиіс. Алайда, кәсіпкерге бас жоспар да, оның жер учаскесі жобаға енгізілгенін дәлелдейтін құжаттар да ұсынылмаған.
Адвокат Татьяна Махначёва:
«Алдымен жерді алып, кейін жоба жасауға болмайды. Барлығы керісінше болуы тиіс — учаске тек бекітілген жоба негізінде алынуы керек».
Компенсация ұсынылды, бірақ заңдылығы күмәнді
Фроловтың нысандары орналасқан аумақ — 0,16 га. Әкімдік 370 млн теңге өтемақы ұсынған. Алайда кәсіпкер бұл шешімді негізсіз деп санайды.
Өз кезегінде әкімдік өкілдері әрекеттері заңға сай екенін айтады — Жер кодексінің 84-бабына және «Мемлекеттік мүлік туралы» заңның 63-бабына сәйкес.
Адвокат сотқа жүгінгенмен, тек формалды жауап алған. Енді кәсіпкер істің толық қаралуына қол жеткізуді көздеп отыр.
Лия Нуртай
