Құлсары қаласында «Атырау» футбол клубы академиясының филиалы ашылды. Бұл – клуб тарихында аудан деңгейінде жұмысын бастаған алғашқы филиал, деп хабарлайды AtyrauTODAY тілшісі.
– Құлсары филиалының бапкерлері «Атырау» футбол клубының базасында тағылымдамадан өтіп, кәсіби біліктілігін арттыру мүмкіндігіне ие болады. Бұл жас футболшыларды дайындау сапасын арттыруға мүмкіндік береді, – деді клуб бас директоры А.Тлеужан.
Жылыой ауданының әкімі Жұмабек Қаражанов бұл бастама балалар мен жасөспірімдердің спортқа қызығушылығын арттырып, аудан футболының дамуына серпін беретінін атап өтті.
Ашылу аясында «Атырау» ФК U-21 командасының ойыншылары мен клуб бапкерлері жас спортшыларға шеберлік сағатын өткізіп, тәжірибелерімен бөлісті. Сонымен қатар 2014–2015 жылы туған жасөспірімдер арасында жолдастық кездесу ұйымдастырылды.
Қазір «Атырау» футбол клубы балалар футболын дамытуға басымдық беріп келеді. Осы бағыттағы жұмыстар аясында клуб Сербияның танымал «Црвена Звезда» командасымен ынтымақтастық туралы меморандумға қол қойған.
Алдағы уақытта сербиялық клуб өкілдері Атырауға келіп, академиялық жүйесімен таныстырып, жергілікті жаттықтырушылармен тәжірибе алмасады. Сондай-ақ «Атырау» академиясының, оның ішінде Құлсары филиалының бапкерлері кәсіби дайындықтарын жетілдіруге мүмкіндік алады.
