Қарағанды қаласында "Qazaqstan_fma" ұйымдастыруымен ардагерлер мен әуесқойлар арасында жеңіл атлетикадан Қазақстан Республикасының чемпионаты өтті, деп хабарлайды AtyrauTODAY тілшісі.
Атыраулық спортшылар өңір намысын қорғап, жоғары нәтижелер көрсетті. Команданың мақтанышы — Айгүл Уалиева 60 м, 200 м, 800 м және 1500 м қашықтықтарында бірінші орын алып, төрт бірдей алтын медаль жеңіп алды.
«Өзімді көрсетуге, мықтылардың қатарында болуға мүмкіндік бергені үшін Қазақстанның Master Athletics федерациясына алғыс айтамын. Алға ұмтылып, дамудан тоқтамайтын жандардың ортасында болу — үлкен мәртебе. Сондай-ақ бапкеріме еңбегі мен маған деген сенімі үшін рақмет. Бір орында тұрмай, алға қарай жылжи береміз», — дейді спортшы.
Сондай-ақ, Жұлдыз Заманғалиева да үздік нәтиже көрсетіп, 60 м, 200 м және 800 м қашықтықтарында үшінші орын иеленді. Жеңіспен елге оралған спортшы қыздар Атыраудың абыройын асқақтатып, қала тұрғындары үшін зор мақтанышқа айналды.
