Атырауда Жайық өзенінде балық аулау ережесін бұзған екі азаматқа қатысты әкімшілік шара қолданылды. Бұл туралы AtyrauTODAY тілшісі хабарлайды.
Атырау облыстық балық инспекциясы бөлімінің мамандары өздеріне бекітілген Жайық өзенінің учаскелерінде бақылау-рейдтік іс-шаралар жүргізді.
Рейд барысында екі жеке тұлғаға қатысты Қазақстан Республикасының Әкімшілік құқық бұзушылық туралы кодексінің 383-бабының 1-бөлігі бойынша әкімшілік хаттамалар толтырылды.
Сонымен қатар, балық аулаушыларға қолданыстағы балық аулау қағидалары түсіндірілді. Мамандар тәуліктің қараңғы уақытында балық аулауға, сондай-ақ мөлшері белгіленген кәсіпшілік өлшемнен кіші балықтарды аулауға тыйым салынатынын еске салды.
Сондай-ақ, өзен жағасында тазалықты сақтап, қоқыс қалдырмау қажеттігі жөнінде түсіндіру жұмыстары жүргізілді.
