Құлсары қаласында жол-көлік оқиғасы болып, салдарынан үш жолаушы ауруханаға жеткізілді. Оқиға 20 қыркүйек күні сағат 18:50 шамасында Махамбет көшесінде болған, деп хабарлайды AtyrauTODAY тілшісі.
Атырау облысы Полиция департаментінің мәліметінше, жол-көлік оқиғасына Yutong автобусы мен арнайы техника қатысқан. Соқтығысу салдарынан автобуста болған үш жолаушы түрлі дене жарақаттарымен медициналық мекемеге жеткізілді.
Қазіргі уақытта полиция қызметкерлері жол-көлік оқиғасына қатысты қажетті материалдарды жинақтап, оның нақты себептері мен мән-жайларын анықтап жатыр.
Оқиға бойынша тиісті тексеру жұмыстары жүргізілуде.
Құқық қорғау органдары жүргізушілерді жол қозғалысы ережелерін қатаң сақтауға, жолда қауіпсіздік талаптарын ескеруге және жылдамдық режимін бұзбауға шақырады.
