Атырауда сегіз жастағы бала ойын алаңында ауыр жарақат алды, деп хабарлайды AtyrauTODAY тілшісі.
Атырауда Б.Аманшин көшесі, 74/72 мекенжайындағы балалар ойын алаңында оқыс оқиға болды. Бұл туралы "AtyrauOil" жазады. Тұрғындардың айтуынша, сегіз жастағы бала турникке шығып ойнап жүріп құлап, ауыр жарақат алған. Оқиға 8 мамыр күні болған. Бала ауруханаға жеткізіліп, қазіргі уақытта дәрігерлердің бақылауында жатыр. Оған бас миының шайқалуы, мұрын сүйегінің сынуы, сондай-ақ беті мен ерінінің ауыр жарақаттары диагнозы қойылған.
Тұрғындардың пікірінше, ойын алаңы қауіпсіздік талаптарына толық сәйкес келмейді және әлі толық аяқталмағанына қарамастан, балалар пайдаланып жүр. Сонымен қатар, олардың айтуынша, аумақта бейнебақылау камералары орнатылмаған.
«Балалар алаңы қауіпсіз болуы керек. Бүгін бұл менің баламның басынан өтті, ертең басқа баламен де қайталануы мүмкін» дейді қала тұрғыны.
Тұрғындар жауапты қызметтерді нысанды тексеріп, балалардың қауіпсіздігін қамтамасыз ету бойынша шаралар қабылдауға шақыруда.
