Атырауда кәмелетке толмағандар қатысқан жанжал салдарынан сегізінші сынып оқушысы зардап шеккен оқиға бойынша қылмыстық іс қозғалды, деп хабарлайды AtyrauTODAY тілшісі.
Жасөспірімнің анасының айтуынша, ұлын алдап пәтерге шақырып, бірнеше сағат бойы бірнеше адам жабылып ұрып-соққан. Әйелдің сөзінше, оқиға 29 мамыр күні болған. Мектеп оқушысының танысы оны кездесіп, серуендеуге шығуға шақырған. Алайда әдеттегі кездесудің орнына жасөспірім пәтерге барып, онда өзін бірнеше кәмелетке толмаған жасөспірім күтіп тұрғанын көрген.
«Түскі сағат үштен кешкі алтыға дейін оны бөлмеде ұстап, кезек-кезек ұрып-соққан. Бір балаға қарсы тоғыз адам шықты. Ол сыртқа да шыға алмады, көмекке де шақыра алмады», – дейді зардап шеккен оқушының анасы.
Оның айтуынша, оқиғадан кейін жанжалға қатысушылар мен олардың ата-аналарын өздері анықтауға мәжбүр болған. Себебі бастапқы кезеңде барлық мән-жайлар жедел түрде анықталмаған.
Отбасы медициналық рәсімдердің жүргізілу тәртібіне де наразылық білдірді. Анасының айтуынша, сот-медициналық сараптама бірден тағайындалмаған, оның орнына оларды дене жарақаттары туралы анықтама алу үшін травматология бөліміне жіберген.
«Бізге сараптаманы бірден тағайындаған жоқ. Жұмыс күні келгенше және мамандар болғанша күту керектігін айтты», – деді ол.
Бұл жағдай әлеуметтік желілерде үлкен қоғамдық резонанс тудырды. Қолданушылар оқиғаның әділ тергелуін және жасөспірімдер арасындағы зорлық-зомбылық пен буллинг мәселесі аясында қатаң құқықтық баға берілуін талап етуде.
Зардап шеккен баланың туыстары да Атырау облысы Полиция департаменті басшылығынан істі жеке бақылауына алуды сұрады.
Полицияның ұстанымы
Атырау қалалық полиция басқармасы оқиғаға қатысы бар 15–16 жастағы барлық жасөспірімдердің анықталып, заңды өкілдерімен бірге полиция бөліміне жеткізілгенін хабарлады.
Аталған факт бойынша қылмыстық іс қозғалып, сотқа дейінгі тергеп-тексеру басталды.
Сонымен қатар, жасөспірімдер ішкі істер органдарының профилактикалық есебіне қойылды. Жиналған материалдар кәмелетке толмағандардың істері жөніндегі комиссияға жолданды.
Балалардың ата-аналары балаларды тәрбиелеу жөніндегі міндеттерін тиісінше орындамағаны үшін әкімшілік жауапкершілікке тартылды.
Полиция кез келген заңға қайшы әрекет заң аясында жауапкершілікке әкелетінін атап өтті.
Қазіргі уақытта тергеу амалдары жалғасуда. Ресми қорытындылар мен процессуалдық шешімдер тергеу нәтижесіне қарай қабылданады.
