Атырау қаласы әкімдігінде қала әкімінің орынбасары Ердос Әбдісаттаров қаладағы мекеме басшыларымен арнайы жиын өткізді, деп хабарлайды AtyrauTODAY тілшісі.
Басқосуда Наурыз мейрамын жоғары деңгейде ұйымдастыру, «Наурызнама» онкүндігі аясындағы іс-шараларды бірізді жоспарлау және мерекелік безендіру жұмыстары талқыланды.
Жиынды ашқан қала әкімінің орынбасары ең алдымен жиналғандарды көктемнің шуақты мерекесімен құттықтап, Наурыздың ұлт үшін орны ерекше екенін атап өтті.
– Наурыз – біздің ең ұлық мерекеміз. Бұл – жаңару мен жаңғырудың, бірлік пен татулықтың, береке мен ырыстың бастауы. Сондықтан да біз бұл мейрамды мазмұнды, тағылымды әрі ұйымшылдықпен өткізуіміз керек. Әрбір мекеме, әрбір ұжым осы іске жауапкершілікпен қарауы тиіс, – деді Ердос Ғаниұлы.
Биыл “Наурызнама” онкүндігіне сай 18 наурыз күні ұлттық киім шеруін өткізу жоспарланып отыр. Шеру бағыты Сұлтан Бейбарыс алаңынан Исатай-Махамбет алаңы дейін жалғасып, мерекелік концертке ұласады. 22 наурыз күні негізгі мерекелік іс-шаралар Исатай-Махамбет алаңында өтеді. Қала басшылығы барлық мекемелерді аталған шараға белсенді қатысуға шақырды.
