Жылыойда 280 орындық жаңа балабақшаның құрылысы аяқталды, деп хабарлайды AtyrauTODAY тілшісі.
Жылыойда 280 орынға арналған жаңа балабақшаның құрылысы аяқталды. Заманауи талаптарға сай салынған нысан жақын арада ел игілігіне пайдалануға беріледі.
Екі қабатты балабақша 1,2 гектар аумақта орналасқан. Ғимараттың жалпы ауданы 3 мың шаршы метрге жуық. Нысанда балалардың білім алуына, шығармашылық қабілеттерін дамытуына және дене шынықтырумен айналысуына қажетті барлық жағдай жасалған.
Жаңа ғимаратта музыка және дене шынықтыру сабақтарына арналған әмбебап зал, үйірмелерге арналған бөлмелер, әдістемелік кабинет, психолог пен логопед кабинеттері, сондай-ақ педагогтерге арналған бөлмелер қарастырылған. Сонымен қатар қызметкерлерге қажетті тұрмыстық және қосалқы бөлмелермен жабдықталған.
Балабақша аумағында балалардың жас ерекшеліктеріне сай топтық ойын алаңдары мен көгалдандырылған демалыс орындары орналасқан. Нысанның үздіксіз жұмыс істеуін қамтамасыз ету үшін қазандық, трансформаторлық қосалқы станция және дизельді электр станциясы орнатылған.
Амандық САҒЫНТАЙҰЛЫ
