Атырауда құрылыс иесі 10-қабаттың бір бөлігін бұзып, қазандықты демонтаждауға міндеттелді, деп хабарлайды AtyrauTODAY тілшісі.
Атырау қаласында Нұрсая шағын ауданында салынып жатқан көпқабатты тұрғын үй кешенінің құрылысында елеулі заңбұзушылықтар анықталды. Тексеруді облыстық Мемлекеттік сәулет-құрылыс бақылау басқармасы (МАСҚБ) жүргізді.
Ведомствоның мәліметінше, «SolarA.kz» ЖШС Қазақстан Республикасының сәулет және қала құрылысы саласындағы заңнама талаптарын бұза отырып құрылыс жұмыстарын жүргізген. Нәтижесінде іс материалдары сотқа жолданды.
Сот компанияны ғимараттың 10-қабатының бір бөлігін бұзуға, сондай-ақ заңсыз салынған қазандықты демонтаждауға міндеттеді. Қазіргі уақытта сот шешімі ресімделу сатысында, оның дайын болуы бес жұмыс күні ішінде күтілуде.
Қолданыстағы заңнамаға сәйкес, құрылыс салушының сот шешіміне бір ай ішінде апелляциялық тәртіппен шағымдануға құқығы бар.
МАСҚБ өкілдері мұндай шаралар өңірде құрылыс сапасы мен заңдылығын бақылауға бағытталған жүйелі жұмыстың бір бөлігі екенін атап өтті. Тұрғындарға жылжымайтын мүлік сатып алар алдында барлық рұқсат құжаттарының бар-жоғын мұқият тексеру ұсынылады.
