Бүгін Атырау қаласы әкімдігінің мәжіліс залында қала әкімі Шәкір Кейкиннің төрағалығымен 2026–2027 жылғы күзгі-қысқы жылыту маусымына дайындық мәселелері бойынша жиын өтті. Жиынға дербес бөлім басшылары, коммуналдық мекемелер мен мердігер мекемелердің өкілдері қатысты, деп хабарлайды AtyrauTODAY тілшісі.
Жиында көпқабатты тұрғын үйлердің, әлеуметтік нысандардың және инженерлік инфрақұрылымның алдағы жылыту маусымына дайындығы жан-жақты талқыланды. Қалалық әкімдіктің баспасөз қызметі мәлім еткендей, қазір қаладағы орталықтандырылған жылу жүйесіне қосылған 1025 көпқабатты тұрғын үйдің 490-ында гидравликалық сынақ жұмыстары аяқталды. Сонымен қатар жеке қазандықтар арқылы жылумен қамтылатын тұрғын үйлерде қазандықтарды жуу, шаю және ішкі жылу жүйелерін қысқы кезеңге дайындау жұмыстары жоспарға сәйкес жүргізілуде.
Сондай-ақ жауапты мекемелерге жылыту маусымына дайындық жұмыстарын белгіленген мерзімде толық аяқтап, тұрғындарды үздіксіз әрі сапалы жылумен қамтамасыз ету үшін барлық қажетті шараларды қабылдау тапсырылды.
Амандық АБДОЛ
Суретті түсірген: автор
