Атырау облысындағы жолдардың 83%-ы – жақсы және қанағаттанарлық жағдайда, деп хабарлайды AtyrauTODAY тілшісі.
Атырау облысының әкімі Серік Шәпкенов Үкімет отырысында жолдарды жөндеу және олардың сапасын бақылау жұмыстары туралы баяндады.
Өңірдегі автомобиль жолдарының жалпы ұзындығы — 6542 км. Оның ішінде:
• Республикалық маңызы бар жолдар — 1115,6 км
• Облыстық маңызы бар жолдар — 846,4 км
• Қалалық жолдар — 2050,9 км
• Аудандық жолдар — 1088,7 км
• Кентішілік және ауылішілік жолдар — 1440,7 км
2025 жылы 45 елді мекенде 78 жоба аясында 235 км жол жөнделді. Нәтижесінде жақсы және қанағаттанарлық жағдайдағы жолдардың үлесі 83%-ға жетті. 2026 жылы бұл көрсеткішті 86%-ға дейін арттыру жоспарланып отыр.
Жол сапасына ерекше назар аударылуда: Жол активтерінің ұлттық сапа орталығы арқылы бақылау күшейтілді, осы мақсатқа бюджеттен 370 млн теңге бөлінді.
2025 жылы 484 ақау анықталып, оның 150-ге жуығы мердігерлер тарапынан кепілдік міндеттемелер шеңберінде жойылды.
Жолдарға түсетін жүктемені бақылау үшін автоматтандырылған өлшеу станциялары орнатылуда: облыстық жолдарда жоспарланған 4 станцияның 3-еуі іске қосылды, республикалық жолдарда жоспарланған 9 станцияның 2-еуі орнатылды, қалған 7-еуі келесі жылы пайдалануға беріледі.
